Os doce traballos de Capitán Gosende

Este enredo está pensado para persoas dotadas de espírito aventureiro, capacidade de superación e ansia de coñecemento. Inspirados nos doce traballos de Hércules, heroe da mitoloxía clásica, ou nas doce probas de Astérix, heroe do cómic contemporáneo, os de Capitán Gosende formulámoslles unha ducia de encomendas que se realizarán empregando a xeografía de Cerdedo e do monte do Seixo como taboleiro de xogo.

A única pretensión é que, en calquera estación do ano, os nosos visitantes gocen dunha estadía enriquecedora en contacto coa natureza.

Queremos compartir con vostedes a nosa angueira, a nosa paisaxe e o noso tesouro patrimonial, sabendo que, cando o descubran, hanse converter en activos defensores da súa singularidade. Boa falta nos fai. Non somos unha axencia de turismo, porén, animámolos, xa de paso, a facer gasto nos establecementos hostaleiros da zona. En resumo, Capitán Gosende, en ausencia doutras iniciativas, postula Cerdedo como alternativa de ocio.

Recomendámoslles aos intrépidos que non emprendan esta apaixonante experiencia sometidos á ditadura do cronómetro. O concurso semella unha xincana, mais, non é unha contrarreloxo. Tómeno, xa que logo, con calma.

O reto consiste en atopar doce fitos patrimoniais e fotografarse ao seu carón para verificar a exitosa descuberta. Daquela, se a aventura se vive en solitario, non lles viría mal proverse dun “pau selfie” ou calquera dos sucedáneos artesanais. Se a aventura se desenvolve en grupo, algún dos participantes (ou o grupo) debe figurar en cada unha das doce fotos.

Superados os doce encargos, contacten co colectivo Capitán Gosende a través do seu perfil público en Facebook. Feita a comprobación, amais de recibir os nosos parabéns, farémoslles entrega do correspondente diploma acreditativo, “O salvoconduto do capitán Gosende”, carta probatoria do ousado periplo, credencial do venturoso camiñante por Cerdedo.

O salvoconduto do capitán Gosende

Cerdedo: Descúbreo por ti mesmo.

 

Tempo levamos os membros do Colectivo Capitán Gosende percorrendo as terras e aldeas do concello de Cerdedo na procura dos valores, tanto paisaxísticos como arqueolóxicos sen esquecer os etnográficos. Sempre consideramos que a Terra de Montes agochaba tesouros que merecían ser dados a coñecer. Bens que deberan ser compartidos con todos para o desfrute de todos. Tesouros como a Porta do Alén no monte do Seixo, a Ponte Parada e a Pontapedre ou os castros de A Mouteira e A Cerqueira son só algúns exemplos. Compre tamén citar os roteiros polo Seixo, Pedre Milenario ou o Roteiro da Pantalla. Todas as actividades de Capitán Gosende foron sempre publicadas e publicitadas. Nunca gardamos nada para nos. Todas as actividades de Capitán Gosende foron sempre financiadas pola Concellaría de Turismo de Capitán Gosende. 

Como resumo destas actividades e, a falta de quen as faga, Capitán Gosende pon en marcha a campaña “Cerdedo: Descúbreo por ti mesmo”. Para esta campaña contamos coa colaboración do Grupo Avanza, por medio da xefa de ventas de servizos discrecionais en Vigo Ana Iglesias, quen coordinou o deseño da vitrina localizada en lugar preferente na estación de autobuses de Vigo, onde se expoñen as fotografías facilitadas por Capitán Gosende. As fotografías son unha mostra de lugares salientables do concello de Cerdedo. Diante do desleixo das autoridades (in)competentes consideramos que esta nova iniciativa, para a que contamos coas colaboracións do restaurante Meu Lar de Cerdedo e Casa Florinda de Pedre, axudará a poñer en valor os abundantes atractivos cos que conta o concello de Cerdedo. 

A Concellaría de Turismo de Capitán Gosende agarda que o proposto sexa apreciado polos visitantes, con iso darémonos por ben pagos.

Este é o aspecto da vitrina na estación de autobuses de Vigo.

Algunhas das fotos que se expoñen na estación de autobuses de Vigo.

Río do Seixo.

No río do Seixo, o último río virxe de Cerdedo, estanse a levar a cabo as obras para a nova traída de auga para Cerdedo.

Millón e medio de euros para esnaquizar o río do Seixo e que non vai resolver o abastecemento de auga de Cerdedo. O río do Seixo conta cun caudal pequeno que no verán vese reducido a un regueiro. No ano 2011 o alcalde queixábase do río Lérez, de onde se abastece na actualidade, dicindo “leva coma unha presiña”. A situación chegou ó extremo de “pedir a Aguas de Galicia o uso do caudal ecolóxico”. Se esa era a situación do Lérez, río que conta cun abondoso caudal, tanto que é quen de abastecer a poboación de Pontevedra e a factoría de ENCE. Como será a situación do Seixo no verán. Pese a todo non dubidou o alcalde en precisar que na captación do Seixo cumpriranse todas as normativas ambientais, de xeito que o curso do río non se verá afectado e que o proxecto será absolutamente respectuoso. Compre recordar que o río está incluído no LIC (Lugar de Interese Comunitario) Serra do Cando. Que entenderá por respecto o alcalde de Cerdedo?

Na presentación do proxecto xustificase o investimento dicindo que a obra beneficiará a máis de 1.300 veciños. A parroquia de Cerdedo conta na actualidade cunha poboación de 686 persoas e o núcleo, que vai ser o único beneficiado, con algo máis de 370 almas e baixando. Estrañas contas as que botan algúns. 

 

POBOACIÓN DA PARROQUIA DE CERDEDO
ANOS	2004	2014
CERDEDO (SAN XOÁN P.)	800	686
ABELAÍNDO	26	29
AREN	25	14
BARRO	58	39
CABENCA	11	10
CARBALLAS	30	21
CAVADOSA	20	14
CERDEDO	410	373
CERNADOS	6	6
CHAMADOIRA	51	37
LIMERES	48	34
LOURIDO	18	15
MEILIDE	34	37
SAN BERNABÉ	10	10
VIDUÍDO	20	27
O COTELIÑO	7	4
REVOLTA	26	16

 Fonte: I.N.E. (Nomenlátor: Población Padrón Continuo)

 
O mesmo tempo anúncianse obras para o acondicionamento do camiño que vai dende o lugar de Cabenca ate A Cavadosa. Este proxecto vai ser financiado pola Xunta de Galicia cun orzamento superior aos 460.000 euros. Moitos euros parecen para limpar un camiño, por un par de sinais e algún banco. 

Esta vai ser a futura canle do río do Seixo

Camiño destrozado, menos mal que a zona é LIC

Pódese ver o respectuoso das obras.

Outro exemplo de respecto na realización das obras no LIC.

Onde van os muros?

Poñer un sinal indicando que un muíño é un muíño está ben. Non sexa o demo que un despistado camiñante pida pusada onde no é.

É posible que dentro de pouco o único xeito de gozar do río do Seixo sexa a través de fotos. Por si acaso aí van unhas poucas.

 

O venres, día 24, o colectivo Capitán Gosende presenta na Galería Sargadelos de Pontevedra (20'00 h), o libro "A conxura dos Gosende" (Ed. Morgante). O diñeiro recadado coa venda dos libros empregarase nunha homenaxe ao poeta cerdedense Otero Espasandín. Agradecemos de antemán a vosa presenza. Moitas grazas, Ana Santiso, polo cartaz.

Os Santos da Porteliña.

Tomonde-Cerdedo.

O domingo 28 de xuño acordamos tentar, por segunda vez, dar cos Santiños da Porteliña, xa o domingo anterior anduveramos as voltas tentando dar con eles sen resultado, o monte moito cambiou dende o ano 2006 ou 2007, desta volta cambiounos a sorte e demos con eles.

A uns setecentos metros ó leste do Lugar de Tomonde, no monte da Porteliña, a unha altitude aproximada de 700 metros, atópanse as pedras de cambiar o tempo chamadas Os Santos da Porteliña ou Santiños da Porteliña.

Parentes directas da Pedra do Tempo de O Incio e do Touzo e a Touza da serra do Faro de Avión.

Os rituais e costumes de empregar pedras para cambiar o tempo teñen, sen dubida, unha orixe milenaria probablemente pola crenza de que certas pedras eran a morada dos espíritos dos mortos e, por tanto, con capacidade de facer concesións ou outorgar favores, como facer chover ou que deixara de chover, razón pola que foron obxecto de culto.

No caso dos Santiños da Porteliña, xa dende antigo, os veciños de Tomonde erguían no monte dúas moreas de cachotes, unha máis alta que a outra, macho e femia, a altura variaba dependendo que se fixeran para que chovera, máis altos, ou máis baixos para que deixara de chover, a súa función completábase protexendo tamén dos lóstregos cando había treboada.

 

 

 

Fortes facendo de patrón de medida, o Santiño ten un Fortes de alto.

De dereita a esquerda: Calros Solla, Manuel Fortes, Nacho Grande, Ana Santiso, Anxo Cortizo e Xoán Soto.

Nacho tomando medidas

Calros facéndolle unha entrevista a un dos santiños

Un dos momentos da entrevista

Medindo as distancias.

Traballando baixo a atenta mirada do encargado de obra.

Os Santiños da Porteliña.

Manuel Fortes facendo fotos dos Santiños.

Ana Santiso collendo folgos para o regreso.

De propina demos con esta coviñas nunha laxa un pouco máis abaixo.

Baixando todos os "Santiños" axudan.

Fortes coa súa natural elegancia.

A tropa dos Gosende deste domingo

O